Оқусыз білім жоқ, білімсіз күнің жоқ Диспут

Диспут Тақырыбы: «Оқусыз білім жоқ, білімсіз күнің жоқ»

Мақсаты:

Оқу – білімнің адам  өміріндегі маңызы мен пайдасы жайлы түсіндіру. Оқушылардың білім алуға деген қызығушылығын арттыру. Оқу арқылы ой-өрісін дамыту, рухани байлығын толтыру, шығармашылыққа баулу.

Әдісі: диспут

Көрнекілігі: проектор, слайд, нақыл сөздер, бейнеролик

Жүр: Тұмсықтының тамағы,

Шоқуменен табылар.

Өнер-білім бәрі де

Оқуменен табылар — деп жырлаған ұлы ағартушы Ы.Алтынсаринның өнегелі өлеңі текке айтылмаса керек.

Армысыздар, алты алаштың айбынды азаматтары мен азаматшалары, құрметті ұстазар мен қадірлі қонақтар.

Бүгінгі «Оқусыз білім жоқ, білімсіз күнің жоқ» тақырыбында өткелі отырған пікірталас алаңына  қош келдіңіздер!

Пікірталасымызды бастамас бұрын құрметті қонақтарымызбен таныс болыңыздар:

  1. Мектеп –гимназия директоры: Д.М.Жумадилова
  2. Директордың ғылыми – әдістемелік ісі жөніндегі орынбасары: Б.А.Инкарбекова
  3. Қазақ тілі мен әдебиеті пәні бірлестігінің жетекшісі: Л.К.Ақылбаева

Сондай – ақ, ақиқаттың шыңына жетеміз деп келіп отырған «Шың мен шын» тобы және «Ақиқат» тобы.

Қазақ даласына да, санасына да сәулесін шашып, сонау Атырау мен Алтай арасындағы алып жер бесігінде тербетіліп жатқан ұлт ұрпағын жерқоңырауша оятып, білім шамшырағымен жылытқан, қанатын кеңге серметіп, қара танытқан теңдесіз тұлғаның бірі Ыбырай Алтынсарин еді.

Ы.Алтынсарин –келешектің күш – қуаты білімде екендігін қазақтың қара қазандай санасына төбеден құйып, төменнен от жаққан ұлы ағартушы. Ендеше ұрпақтың тілегені іздемей – ақ табылғанын іс жүзінде қалап, күндіз күннің, түнде айдың жарығына айналып, қазақ баласына қара танытқан  кез қалай басталғанын бірге көрейік.

Осы тұста сюжетке назар аударайық. (слайд № 2)

Оқушылардың пікіріне құлақ түрсек. Сіздер не дейсіздер?

 

Жүр: Ия, мемлекет кемелдігі білім мен ғылымда екендігі бүгінде дәлелдеуді қажет етпейтін ұғымға айналды. Көне заманғы жыр-дастандары арқылы кемеңгер жырауларымыз тың­даушы көпті білмекке, ілім үйренуге шақырған. Туғаннан зерек, халқының салт-дәстүрін бойына терең сіңірген көреген ғұламалар да ұрпағының болашағы оқуда екендігіне жете көңіл бөліп, кеңінен насихаттаған.

Данышпан Абай атамыз: «Мал да, дәулет те – оқу­да», — деп, ел болашағы – жастардың келешегін біліммен байланыстырған. Дүниенің кілті білімде екендігін кезінде Алаш жұртының қамы үшін күн күлмей, түн ұйықтамай қызмет еткен Ахмет, Мағжан, Шәкәрім тәрізді ұлт зиялы­ла­ры да туындыларының өзекті мәселелері ретінде көрсеткен. Қараңғы қазақ көгіне өрмелеп шығып күн болуды армандаған Сұлтанмахмұт қазақ жастарының рухани жан дүниесіне серпін беруге ұмтылған.

Жүр: Келесі кезекті пікірталас сұрақтарына берсек.

  1. Адам не үшін оқиды? Өйткені, білімсіз…
  2. «Білім –жарқын болашақтың кепілі» екендігіне келісесіздер ме?
  3. Оқу кезінде қандай қиындықтар кездеседі?
  4. Осы қиындықтарды қалай жеңуге болады?
  5. Бүгінгі жастардың оқу-білімге деген қызығушылығы неге төмендеп барады?
  6. «Білімдіге дүние жарық, білімсіздің күні қарып» — дегенді қалай түсінесіздер?
  7. «Білімсіз өмірдің мәні жоқ» Келісесіздер ме?
  8. «Заманауи білім беру» дегеніміз не?

Жүр: Иә, осы ретте оқушылардың әр түрлі пікірлерін тыңдадық, көп рахмет. Келесі кезекті ұстаздарға берсек, түйінді мәселенің түйіткілді шешімін өз ауыздарыңыздан естісек.

Жүр: сөздің майын тамызып, өз ойларын ортаға салып отырған топ мүшелерін ортаға шақырамыз.

«Жүректен – жүрекке » стратегиясы бойынша оқушылар өз алғыстарын білім нәрімен сусындатқан аяулы ұстаздарына арнамақ.

  1. Білім бергендеріңіз үшін рахмет!
  2. Оқуға үйреткендеріңіз үшін рахмет!
  3. Ақыл – кеңестеріңіз үшін рахмет!
  4. Жылы жүректеріңіз үшін рахмет!
  5. Жақсылыққа тәрбиелегендеріңіз үшін рахмет!

Қорытынды: Тоқсан ауыз сөздің тобықтай түйініне де келіп жеттік.

«Білім – гауһар, бағасы жоқ» —  деген халқымыздың дана сөзі текке айтылмаса керек. Осында отырған әрбіріміз инемен құдық қазғандай оқу оқып, күш – жігерімізді білімге жұмсайық.

Бүгінгі айтылған ой – пікірлер ұғатын құлаққа жетті деген үміттеміз.  Көңіл бөліп тыңдағандарығызға рахмет!